TALÓS: Philippine Journal of Language, Culture, and Sustainable Development

About the Journal

TALÓS: Saliksik sa Wika, Kalinangan, at Likas-Kayang Pag-unlad

(TALÓS: Philippine Journal of Language, Culture, and Sustainable Development)

Ang TALÓS: Saliksik sa Wika, Kalinangan, at Likas-Kayang Pag-unlad ay isang bukás at sinusuring palathalaang pang-agham na inilalathala ng Global Research Association for Sustainable Progress (GRASP). Nilalayon nitong maging daluyan ng makabuluhan, masinop, at malalim na saliksik hinggil sa wika, kalinangan, pagtuturo, lipunan, at likas-kayang pag-unlad sa Pilipinas. Itinataguyod ng palathalaan ang mga akdang nagpapalalim sa talós, pagpapahalaga, at paggamit ng wikang Filipino at iba pang wika sa bansa bilang salalayan ng kaalaman, pagkakakilanlan, pakikipamayan, at pag-unlad.

Tumatanggap ang TALÓS ng mga orihinal na saliksik at masusing pagtalakay sa mga pag-aaral na may kinalaman sa wika, panitikan, kalinangan, pagtuturo ng wika, ugnayang pangwika, salin, katutubong dunong, pamayanang Pilipino, pagkakakilanlan, at likas-kayang pag-unlad. Binibigyang-halaga rin ng palathalaan ang mga pag-aaral na tumutugon sa mga pandaigdigang mithiin para sa likas-kayang pag-unlad, lalo na yaong may kaugnayan sa makatarungang pagkatuto, pangangalaga sa kalinangan, pagkakapantay-pantay, mapayapang pamayanan, at makabuluhang pakikilahok ng mamamayan.

Maaaring maglathala sa TALÓS ng mga saliksik na gumagamit ng bilangang lapit, salaysay na lapit, o magkahalong lapit, basta malinaw ang ambag nito sa kaalaman, wika, kalinangan, pagtuturo, at lipunang Pilipino. Hinihikayat ang mga akdang may matibay na batayan, malinaw na daloy ng kaisipan, makabuluhang pagtalakay, at kapakinabangang maaaring magamit ng mga guro, mananaliksik, mag-aaral, tagapagtaguyod ng wika, pamayanan, at mga institusyong nagsusulong ng likas-kayang pag-unlad.